Der Gal, as ist as balsch “Gruppo di Azione Locale Trentino Orientale”, ist a vraischòft as hòt der zil za trong envire s toal Leader van Programma di sviluppo rurale 2014-2020.
Der doi programm ist an strumen as kimmp praucht van lokaln amministrazion, zan pasipil de Provinz, ver za gem aus de zuazoln va de EU ver de lòntschòft, ver za verpessern de umbèlt, ver za gem en de lait òndra strumentn ont asou envire.
S sai’ zuazoln as kemmen va de Eu as prauchen mearer trittn ver za aribarn en de hent van lait as hom pfrok. Der Gal “Trentino Orientale” ist an grupp va derstelln van òllgamoa’omtn ont van privatn. De gamoa’n as sai’ enteressiart sai’: Bieno; Bur, Carzano, Castel Ivano, Castello Tesino, Castelnuovo, Cinte Tesino, Grigno, Novaledo, Ospedaletto, Pieve Tesino, Rontschai’, Ronchi, Samone, Scurelle, Telve ont Telve di Sopra, Torcegno, Vigolana, Baselga ont Badul, Calceranica, Caldonazzo, Zifzen, Vlarotz, Palai ont Oachlait, Fornas, Leive, Schandurschl, Tenna ont Valzurg ont Valisn. De òllgamoa’ derstelln van Gal sai’ der Consorzio van Gamoa’n van Bim Brenta, de Tolgamoa’schòft Hoa Valzegu’ ont Bersntol, de sèll va de Valzegu’ ont Tesin ont de sèll van Primiero, de Gamoa’schòt van zimbern, der park va Paneveggio ont de gamoa’ va Casetel Tesin. De privatn sai’ òlla de Apt ont de Turismusschòftn, de Confcommercio, de vraischòft van hòntbèrker, de vraischòft Agraria va de Bur, de Ecomuseo van Vanoi, de Proloco va Nosellari ont de pònk va Persn ont de sèll van Tesin.
De provinz hòt gem en doi vraischòft Gal der zil za veròrbetn bandi, za trong envire projektn ont òrbetn ont gip aus zuazoln ver za verpessern. Der Gal schauk aus aa de vrogn as kemmen ogem ont schauk benn se no gea’ en de bandi ont benn se kriang meing de zuazoln. De leistn projektn van Psr 2014-2020 barn veròrbetet haier. Der Gal, vour zboa mu’net, hòt ausgaleik vinf naia bandi. Sechber sa ont sechber abia as men mu ogem de vrog.
Der earste hoast se “Interventi a sostegno della formazione professionale e alle azioni di sviluppo locale” ont ist tsbunnen ver de ditte as learnen en de lait ont as mòchen kursn ver de òrbet. De projektn as kemmen zuazolt sai’ kursn ont trèffen. En doi toal, del Gal mu ausgem en gònzn ungefer 110.000 euro.
S zvaite toal ist “Interventi per la multifunzionalità delle aziende agricole e la valorizzazione delle produzioni tipiche locali” ont ist tsbunnen ver de pauer oder vraischòft van pauer as belln verpessern de firma. En doi toal, del Gal mu ausgem en gònzn ungefer an milion va euro.
Der dritte bando ist “Diversificazione dell’attività delle imprese agricole”, ver pauer as belln mòchen òndra dinstn abia zan paispil veròrbetn ont verkaven de produktn, mòchen agriturismo ont asou envire. Der budgen van doi toal ist ungefer vinfhunderttausnt euro.
S viarte toal ist “Sostegno agli investimenti nella creazione e nello sviluppo di attività extra-agricole” as ist tsbunnen ver de ditte as òrbetn en turismus ont as hom birtshaiser, de hlntbèrker ont de sèlln as mòchen dinstn. Der budget ist ungefer viarhunderttausnt euro.
Der leiste ist “Interventi di riqualificazione delle infrastrutture turistiche” o ter tsbunnen ver vraischòft ver za verpessern de strukturn ont za organisiarn pesser der turismus.
Òlla de doin bandi gem de meglechket za nemmen toal finz as de 29 van schanmikeal 2020. Dòra de vrong barn austschauk kemmen ont de earstn barn kriang der zuazol finz as s gèlt garift ist. Der Gal van Trentin Orientale hòt der sai’ sitz en de Bur. Der omt ist offet van ma’ta finz en pfinsta, vria ont nomitto ont en vraita lai de vria.
De sèlln as sai’ enteressiart za vrong eppes oder za nemmen toal meing telefoniarn en numer 0461 1486877.

(LORENZA GROFF)