En vender ai 24 de setember l’é stat la zerimonia per l diéjem cedean del Festival de la Joentù Euregio alò da la Landhaus de Dispruch. L festival de la Joentù de l’Euregio l’é stat metù a jir del 2011 – an olache l’é stat metù sù l’Euregio Tirol-Sudtirol-Trentin – e apontin per chest l’é stat conscidrà la “mère” de duc i etres projec de l’Euregio per i joegn.

En dut vegn portà dant 9 projec Euregio a l’an, da l’Euregio Summer Camp, a l’Orchestra di strumenc a fià, a l’Euregio Academy, che se ouc mascimamenter ai joegn del Tirol, Sudtirol e Trentin. L’obietif l’é chel de arvejinèr i joegn di trei teritories a la desferenzes e ai aspec comuns de l’Euregio, estra che a portèr inant la competenzes linguistiches.

Chest an, a cajon de la normes contra l Covid, demò 30 joegn di trei raions à tout pèrt al Festival de la Joentù che l’é stat a Steinach dai 22 ai 25 de setember. Se à rejonà dintornvia i aspec desferenc de l’Euregio dessema con i politics e i esperc de l’Euregio. L program l se à serà sù co la vijites al “Mondo delle gallerie BBT” e na vijita compagnèda a Dispruch.

Dant che crepe fora la pandemia de mèrz del 2020, 60-90 partezipanc se à binà te ogne raion de l’Euregio. Dal 2012, l Festival de la Joentù Euregio l’é jà ruà te 23 Comuns. En dut, più che 700 studenc à abù l met de cognoscer l’Euregio e de se fèr neves amisc de gra al Festival de la Joentù Euregio.