Descorir i teritories del Euregio viajan debant co la corieres e ferates tel Tirol, Sudtirol e Trentin: per chi che à n abonament per un an o per sie meisc per l trasport publich o à l Euregio Family Pass, chest sarà possibol en sabeda ai 17 de setember del 2022, te la Dì de la mobilità Euregio, endrezèda endèna la Setemèna europeèna de la mobilità.
Chest apuntament, che vegn metù a jir doi outes a l an, chest’outa l porta dant novitedes enteressantes: estra che poder viajèr per duta le region europeèna debant, da Kufstein a Borghetto, per chi che à l abonament o l Euregio Family Pass l é pervedù l’entrèda debant per sacotenc musees de la provinzies de Trent e Busan e del Tirol. Per duc i sentadins, estra apede, vegn orì i ujes de la sentes de informazion e coordenament del Euregio a Trent, Busan e Dinspruch. L orarie de orida l é da les 10.00 enscin la una domesdì de la medema dì, col met de poder tor pèrt ence na vijita compagnèda fata dai membres del team Euregio dal post. Per l Trentin, Casa Moggioli, senta del Euregio a Trent, la speta picioi e gregn con n program de vijita che va a cher, enveze l’entrèda debant la é perveduda per l Muse e i ciastie trentins: Castello del Buonconsiglio, Castel Stenico, Castel Beseno, Castel Thun e Castel Caldes. Per la provinzia autonoma de Busan à tout pèrt a la scomenzadiva l Museo archeologich del Sudtirol, l Museo de la scienzes naturales del Sudtirol e l Museo Eccel Kreuzer (demò mostra spezièla); per l Land Tirol l Ferdinandeum, l Volkskunstmuseum, la Hofkircher, la Zeughaus, l Tirol Panorama mit Kaiserjägermuseum.