En eirta as ist verpai hòt se gahòltn der praisaustoal van Konsurs 3X1. Der doi trèff aa ist kemmen organsiart en videokonferenz bavai pet de nain regln van Covid hom sa nèt en Institut organisiarn gameicht.
Za stelln vour en de toalnemmer ont za griasn sa, sai’ gaben de mittoaln van Amministrazionrot pet en President ont pet en Viarer, der Regionalasesor van sprochminderhaitn Manfred Vallazza ont de derstelln van praisgericht.
S hòt u’pfònk der Luca. Er hòt gagriast òlla de toalnemer ont der Asesor aa as hòt gameicht toalnemmen en trèff. Ber hattn tsbunnen za meing ens vinnen òlla zòmm – hòt er tsòck – ont s barat schea’ gaben ober pet de doi kronket, haier hom ber nèt de doi   meglechket gahòp. Ober ber sai’ dena vroa za meing ens sechen. Ber griasn der Regionalasesor – hòt er tsòck – ont ber song en gèlsgott ver de sai’ glaimekait en de inser gamoa’schòft ont de Autoritet ver se sprochminderhaitn.

Der Regionalasesor hòt gèlstgott tsòck za hom en inngalònt ont er ist vroa gaben za meing toalnemmen. Er hat gebellt nou mear arokemmen za vinnen ens ober pet de doi kronket sèll aa ist nèt meglech gaben.
Za klòffen van projektn abia der Konkurs 3X1, s ist an schera’n projekt – hòt er tsòck – ont er hòt inngalònt de bersntoler za stelln vour òndra projektn aa en Region bavai de meglekait za hèlven, barat s.
Dòra der viarer van Bersntoler Kulturinstitu hòt klòfft van Projekt 3X1, er hòt a bea’ne vourstellt de gschicht van Projekt. S ist toalt en drai toaln – hòt er tsòck – der “Schualer ont student” as ist an konkurs gamòcht ver de gschichtn ont de untersuach as de insern schualer ont studentn belln veròrbetn ont kontarn.

Der Filmer – hòt er tsòck – ist a bea’ne speiter organisiart kemmen. Ober s ist an konurs as sicht òlbe mear toalnemmer. Velaicht bavai de jungen vinnen se guat pet der strument van film ont bavai der film ist ist a guats mittl za kontarn gschichtn. S dritte toal ist “Schrift” ver tèckst ont poesie.
De òrbetn as sai’ kemmen vourstellt haier sai’ 18 gaben ont de mearestn sai’ abia òlbe jungen.
Dòra hom klòfft de derstelln van praisgericht. De Cristiana Ploner as ist pet en Maurizio Paoli ont de Patrizia Bocher mittoal van praisgerischt van “Schualer ont student” hòt vourstellt de òrbetn van konkurs. De hom austschauk 3 òrbetn, zboa ver de sezion Schualer ont an òrbet ver de sèll student. De kritern as se hom praucht za schaung aus de òrbetn – hòt se tsòck – sai’ de doin gaben: abia as de òrbet ausschauk, de qualitet van tèckst, bos as kontart der tèckst ont der tema.

De Pratrizia Bocher hòt vourstellt de òrbetn. Ver en konkurs Schualer hòt s gahòp zboa lait ont peada hom der Goldschualer kriakt: de Aurora Moltrer hòt tschrim de gscicht “I ont de mai’ familia” ont de Rachel Oberosler hòt tschrim “S maisl ont der vucks”. David Toller as hòt toalganommen en Konkurs Student hòt kriakt der Kupferstudent pet de òrbet “Due raltà di minoranze linguistiche nella Spagna contemporanea: il catalano e il valenciano” .
Dòra Cristiana Ploner hòt vourstellt de 9 òrbetn van Konkurs Schrift: 5 ver de gschicht ont 4 ver de poesia. De kritern za gem de prais sai’ gaben: abia as de òrbet ausschauk, der tema, de qualitet van tèckst ont de sproch. De prais as sai’ kemmen ausgem sai’ de doin. Ver de prosa, an prais en Gabriele Moltrer as hòt tschrim “S lem va de Angelina” ver za sai’ braf gaben. A kupferveder ist kemmen gem en  nicola Moltrer pet “Zboa priader en Ungarn”. An òndra kupferveder en Barbara Laner pet “Kea rum…i bòrt der”. Silberveder en Sonia Oss pet “De vòrm van herbest” ont gòldveder en de Barbara Toller pet “De pai ont de vlaig”.
Ver de sezion poesia, kupferveder en de Ilaria Oss pet “Der koronavirus” ont en Evelina molinari pet “De bèlt hòt a tschlèchte kronkait”. Goldveder en de Paola Petri Anderle pet “Òlls ist still” ont en de Maria Zott  as hòt vourstellt zboa òrbetn “Schnea” ont “S schneavlèckl”.

De derstelln van praisgericht hom tsòck as sai’ òlla runt schea’na òrbetn ont de sproch kimmp òlbe pesser praucht ont de grafi aa.
Dòra de Manuela Pruner hòt vourstellt de òrbetn van Konkurs Filmer. De kommission ist gamòcht va Nicola Oberosler, Micol Cossali e Manuela Pruner. De òrbetn sai’ 6 gaben. De temen kearn um de insern praich ober de sai’ en an originaln vurm veròrbetet kemmen.
De kritern za schaung sa aus, abia as ist tschrim en de regln, sai’ de doin gaben: s sai’ originell ont hom tschèrlt anguatn innhòlt, der vurm as ist kemmen tschèrlt zalòng schaung s tema, de technischn kompetenzn as men zoakt hòt. De prais as sai’ ausgem kemmen sai’: Barbara Toller pet “An guatn schelver”, Federica Iobstraibizer pet “S schmòlz” ont Arianna Iobstraibizer pet “Heivlpinz” hom kriakt an prais za sai’ braf gaben. Kupferfilmer ist
Der dritte filmprais ist kemmen gem en Nicola Marchel pet “Kajag en Bersntol, van nono en nef”, zbaite Filmprais en Elisa Pompermaier “De Stela en Vlarotz, pilder van an prauch òlbe lebet” ont Earste filmprais en Stefano Moltrer pet “Palai still, Palai envir”.
Zan leistn, der President van Bersntoler Kulturinstitu hòt sperrt der trèff. Er hòt se padònkn pet òlla de taoalnemmer, iberhaup en doi moment as ist asou hòrt meing en de doi kronket. Der bando ver an ònders jor ist schoa’ ausgaleik kemmen ont de toalnemmer hom bail finz as de 31 van merz za nemmen toal. Der konkurs – hòt gadenkt der President – ist òlbe organisiart kemmen pet de hilf va de Region Trentino Sudtirol. S sai’ bichtega projektn ver en Insitut as hom ens gem de meglechket za sechen ont za lesn schea’na ont bichtega òrbetn ver de inser gamoa’schòft.
De enteressiareten meing sechen der video van trèff as de websait van Bersntoler Kulturinsitut www.bersntol.it. S sai’ drau de peistn òrbetn van toalnemmer aa.
Hoff ber za meing ens vinnen òlla zomm an ònders jor!

LORENZA GROFF