Devo dir che con le dòne son propri sfigà: 3 matrimoni, 3 funerali. Son sicur che per molti lettori questa no la pàr na gran sfiga, ma se tegnì conto dele spese accessorie (i costi dele cerimonia, i pranzi al Bar Ciolda, i viagi de nozze en val de Cembra) moltiplicadi per tre, capì anca voi che le me finanze no le pòl soportar altre disgrassie.

La prima la se ciamava Augusta. Come la moto. Nel senso che la fèva 6 km al litro (de Teroldego). Valsuganota con tanto de pedigrì. A so modo la era anca simpatica nela me compagnia de amizi. La gaveva gli incisivi con funzionalità apri-bottiglia. En mito indimenticabile al bar de Zivignago. Grande apasionata de fonghi (quèi che se magna, no c’entra gnent con el Cosmic-remember-Baldelli) nèven tute le domeneghe nel spiazàl dela Sloi, ‘ndò che creseva dei fonghi mirabolanti con vaghe proprietà allucinogene. A mi no i me piass, ma ela la era ghiotta e me par de vederla ancora far colaziòn la matina con le brìse toncade zò nel lat. Purtroppo en triste dì… en fòng envelenà… Me ricordo ancora el so soriso beato a 46 denti sparsi irregolarmente, mentre me sospira le so ultime parole dense de sentimento: “ricòrdete che ancòi l’è mèrcol, passa quèi del Comun, mèti fòra la plastica ensèma ale lattine”.

La seconda la se ciamava Iole. L’ho conossuda su Bazar. La fèva la fotomodella ma la g’aveva tanto tempo libero. A dir el vero no ho mai vist na so foto sui giornali de moda, ma forsi l’è stà meio così. Anca èla l’era na appassionata de tuberi, a so modo. Tuti i dì tacàda al celulare con i sò amizi fongaioli. Me ricordo che spèss la nèva per fonghi en orari noturni imprevedibili con le so amiche. Ma mi ghe volevo bèn, per via del stipendio. Longhe pasegiàde en zerca de fonghi. Gavèven en posto segreto per la racolta dei fonghi. No ve digo el posto altrimenti vèn massa zènt e son geloso, podo sol dirve che l’era en càmp drìo a n’acciaieriaen Valsugana. I fonghi i g’aveva en colòr metallizzato lucicante, e ala Iole ghe piaseva tànt. I era fonghi strani, però. Ricordo che en dì la Iole con en rutàzz la m’ha cromà el MotoApe. Ma le cose pù bèle ahimè no le dura. N’altro fòng envelenà… Addio Iole. El cellulare el continua a sonàr. L’è i so amizi che vol ofrirme soldi per no ho capì che genere de fungo medicinale. Nel dubbio l’ho fata cromare.

La terza la se ciamava Armida. L’ho copàda. No ghe piaseva i fonghi.