Vardè putèi che de sti tempi no se scherza ! I è finidi i tempi en cui se podeva nar en torno ala “Tulio Pinter”. Masa perìcoi sula strada. A nar en torno en moto o en auto no gh’è pù da star tranquili. Bei tempi quando che se podeva far i testa-coda en mezz ala via Brenero o le gare clandestine Piazza Fiera-San Donà en piena sicurezza. O la Fricca en vespa su na roda guidando con na man sola mentre con l’altra te rollavi en Samson senza filtro en piena tranquillità. Le strade le è deventade na trapola mortale! Motivo de tuto questo ?  Savè tuti de quel che parlo: massa vigili, caramba e puffi en giro. Lori no i è cressudi con el noss “bekgraund culturale” e no i riesse a capir la poesia de n’empenada col Gilera del ’82 o l’eleganza de en spazzetòn en piazza a Canova durante la messa dela domenega con el Ritmo Abarth del me amico Pedri. O far le gimkane con el Laverda en mezz ala processione de Pasqua en Gardol, per la gioiosa partecipazione dei fedeli… basta. Da quando che i se messi en testa de far rispetar la legge sule strade, è finì el luna-park ! Ocio quindi ai pericoli sula strada: podè riconosserli facilmente dal fato che de solito i porta na divisa con paletta e i pòl minacciarve con l’arma letale detto “etilometro”. Quindi pian col bèver e col acceleratore, no se scherza ! Ma soprattutto no stè a far i spiritosi: el pù dele volte no i g’ha nessuna voia de scherzar, e poderìa risultar pericoloso: i vigili no i ve scolterà, i coi puffi l’è inutile, i caramba no i parla en servizio. Quindi ocio, eco alcuni utili sugerimenti su quel che l’è meio NO dir a n’om en divisa:
 
“el me tègna chi el fiaschèt de vin, chè no riesso a trovàr la patente!”
 
“ospio! El me scusa signor vigile, m’ero desmentegà de tacàr el rilevatòr de autovelocs”
 
“cazzo ! t’ho riconossù: ti te sei quel dei Village People !”   
 
“ma te par el modo de nar en giro ? te devi aver fat almen i 190 per ciapàrme!”
 
“ma a voi i ve assume dopo en test de intelligenza ?”
 
“no te me varderài miga nel baul de drè adess ?”
 
“varda vecio che son mi che te pago el stipendio!!”  (forsi la frase pù pericolosa en asoluto)
 
“volevo star al passo del trafico, ma sicome che no gh’è en giro nissun, corèvo per raggiungerli”
 
“che culo! 30 km fa anca el so colega el m’aveva dat sol n’avertimento!”
 
“ho lassà la patente a casa, ma però g’ho chi el bancomat!”
 
Ensoma: fè i bravi e se volè ancor divertirve sule strade…. Gh’è la plaistescion, almen lì no s’encontra zerti pericòi…