De Fuen ist de greaseste organisasion en Europa en Europa va lokaln minderhaitn ont gruppn va lait. Der sai’ zil ist za trong en Europa de vrong va de lokaln gruppn ont za schitzn ont za gem bèrt en de identitet, en de sproch ont de kultur va de doin lait. Van 2018 envire hom sa organisiart der projekt Minority SafePack: de hom auganommen an milion va unterschriftn ver za meing verlòngen de Europeische Kommission za mòchen ont nemmen u’ a gasetz asn tema va de mearkulturalitet ont va de mearsprocheket.

Sechber abia as funkzioniart der doi projekt. S ist an strument vourtsechen en europeische gasetz no en Trattato va Lisbona van 2009.
Pet an milion va unterschriftn mu men gea’ vour de europeische kommission ont verlòngen za nemmen u’ a gasetz asn tema.
De hom u’pfònk za klòffen va de doi iniziatif schoa’ en 2009. En 2013 der projekt ist kemmen vourstellt vour de Europeische kommission, as hòt en nèt gabellt registriarn. De Fuen alura ist gòngen vour de Corte di giustizia en Lussemburgo ont de D hom gabungen. En 2018 sai’ sa aribart za nemmen au 1 128 385 unterschriftn en 11 stòttn. De sai’ kemmen auganommen en de inser gamoa’schòft ont en de inser provinz aa. Vour a por jor ist kemmen organisiart gahòp an kongress afn doi tema en Bersntoler Kulturinstitut aa.

Iaz der President va de Fuen ont deputat van europeische parlament Loránt Vincze hòt pakemmp de Europeische komission ver za stelln vour der projekt. Der President, bail en de pressekonferenz as ist kemmen organisiart no en trèff, ist runt vroa gaben va de doi vourstell ont van interesse va de kommission.
Der zil va de Fuen – hòt er tsòck – ist za schitzen ont za gem bèrt en de lakaln gruppn ont en de sprochen minder kennt gèltsgott en de strumentn va de politik.

Der trèff hòt se gahòltn as de 5 van hourneng ont de Fuen hòt vourstellt vour de europeische kommission de nai’n punktn van projekt SafePack.
De derstelln van projekt hom pakemmp de vicepresidenten va de kommission Vera Jourová, der europeische kommissar Mariya Gabriel ont òndra derstelln va de kommission.
En de Europeische union – hòt gadenkt der President va de Fuen – hom ber koa’ gasetz afn tema va de schitz van sprochminderhaitn. Der projekt SafePack hòt prope der doi zil.

Zan earstn, za schitzn ont za gem bèrt en de mearsprocheket ont en de kultur van miderhaitn en Europa pet mearer strumentn. Zan paispil pet en lear en de schual van sprochen minder kennt. Oder gem en de lait de meglechket za hom piacher en de doin sprochen. Oder zuazoln de media – television oder zaitschriftn – as gem bèrt en de sprochen.
Drucken de dokumentn en de lokal sproch ont meing sas prauchen iberòll abia offizielsproch. Leing drinn en bilanz van stòttn de doin politik va hilf. Trong envire projektn ver za meing òrbetn en de doin gamoa’schòftn.

En dokument ist kemmen proport an Europeischen zentrum va de mearsprocheket ver za hèlven de òllgamoa’omtn za trong envire de doin strumentn.
Iaz as der projekt ist kemmen vourstellt, bòrt ber der omport va de Europa ont s gasetz as bart u’ganommen kemmen.

Lorenza Groff