De leistn zboa mu’net sai’ runt schbar gaben ver de insern lait. S pariart asou vèrr de vosnòcht, de koskrittn, de lait as gea’ umandonder af de pèrng. Ont enveze sai’ lai zboa mu’net virpai…
En doin bochen hom ber gamiast learnen za stea’ hoa’m, za meing nèt umandonder gea’, za miasn en òlls aupasn. De datn as ber hearn en television sai’ nèt guat ober s pariart za vòngen u’ za sechen eppes pesser. Ont s pariart as de doi strategi ist der oa’zege vurm za gabingen keing en doi virus.

Òlla de schualn sai’ sperrt va lònk. De hom schoa’ sperrt gahòp de boch van vòschnto. Dòra hom sa bider u’pfònk ver drai to ont dòra hom sa bider sperrt van 5 van doi mu’net. S ist laischiar a mu’net as de schualer ont de studentn sai’ hoa’m. Ober de hom se guat organisiart pet de mittln as gip ens de teknologi. Iaz kenn ber ens òlla aus va videokonferenze, G Suite, Classroom ont asou envire!
Ber sai’ gabet za sechen en de leistn bochen òlbe mearer sitzn ont omtn as sperrn. De doi boch, pet de leistn gasetzn van Governo, hom sa sperrt òlls sèll as se hom gameicht: lai de boteing ont òlls sèll as hòt za tea’ et en èssn, de apoteken ont de firmen van madesi’n, de pònk, de post ont an ettlena òndra dinger sai’ nou offet. Der rèst ist òlls sperrt.

Ver za gea’ enkeing en de lait, de inser provinz, de òllgamoa’omtn ont de firmen hom organisiart dinstn ver de lait. Vònk ber u’ za sechen abia as hom se se organisiart en inser tol.
De insern Gamoa’haiser sai’ offet lai en de vria pet an u’stellt aloa’. Pesser menn de lait  telefoniarn oder schraim an e-mail ver za stelln vour de probleme. Der telefonnumer van gamoa’haus va Garait ist 0461 549500, de e-mail adress ist segreteria@comune.frassilongo.tn.it. De sèlln va Palai sai’ 0461 5500071 ont segreteria@comune.paludelfersina.tn.it. De sèlln va Vlarotz 0461 551104 ont segreteria@comune.fierozzo.tn.it.

S Bersntoler kulturinstitut hòt bissn galòt as van 23 va merz van 2020, der sitz bart sai’ sperrt finz as de noat ist verpai. De mitòrbeter van BKI barn òrbetn pet “smart work”. An iata nochricht mu men schicken en de e-mail adress oder u’riaven de numer 0461 – 550073.

Za innkaven hòt mindeger probleme bavai de boteig as ist offet abia vouraus. Ver za hèlven en de lait as noat hom, de gamoa’n van tol gem de meglechket en de sèlln as meing nèt gea’ a innkaven en de boteg, za riaven u’ de gamoa’ ont s zaitg u’tschòffen bart kemmen trong hoa’m. S glaich ver de madesi’n. Dòra, hòt s an òndra meglechket ver de lait.  S ist der dinst #Resta a casa, passo io. S ist an iniziatif va de Provinz zòmm pet en Zivilschutz as ist tsbunnen ver de lait as noat hom, ver de elteren lait ont ver de sèlln as lem aloa’. Benn men hòt noat va zaig za èssen, va madesi’n oder lai za klòffen, mu men u’riaven der numer 0461 495244. Men mu telefoniarn òll to van ma’ta pis en sunta va um òchta en de vria finz um òchta zobenz.

Lorenza Groff