A bia òll jor, haier aa kimmp organisiart der konkurs as denkt de figur va de grèfin Caterina De Cia Bellati Canal. Der prais ist kemmen gabellt van sai' mònn, der ingenier Alberto de Cia. Derno as er hòt ens galòt, ist der Istituto Bellunese di Ricerche Sociali e Culturali za trong en envire. S ist an konkurs as kimmp organisiart òll jor ver za gem bèrt en piacher ont en tesi va laurea a klòffen van Alpn ont van sprochen as kemmen klòfft.

Caterina De Cia Bellati Canal ist storm en 2006. De hòt se laureart gahòp en glottologi pet an dokteròrbet as de sproch va Timau/Tischlbong va de Provinz va Udine.
Der prais ist offet en òlla de sèlln as belln toalnemmen pet drucketa piacher oder dokteròrbetn.
De edizion va haier ist reserviart en de piacher.

De autorn as nemmen toal kemmen toalt en viar sezion: lunguistisch (dilektn ont sprochen klòfft as de Alpn), gschicht ont kunst (lokal gschicht, kunst gschicht, biografi), saggi (antropologi, ekoligi, sociologia), gshcicht (piacher, gschichtn asn tema van alpinismo).
S mu toalnemmen der autor van puach, de sèlln as hom gadruckt s puach ont vraischòftn. De piacher miasn gadruckt kemmen sai‘ van 2015 finz en 2020.
Der prais ist kemmen organisiart ver en earste vòrt en 2007. Van 2010 er kimmp organisiart ka Belluno en sitz van Istituto Bellunese di Ricerche Sociali e Culturali . Er hòt de unterstitz van Minister van Kulturalpahalter, van Cai ont van Gruppo Italiano Scrittori di Montagna.

De òrbetn barn austschaukt kemmen va de giuria as ist gamòcht va auskenneta lait en doin temen.
De giuria ist gamòcht, ver en va Piercarlo Begotti, Flavio ont Fulvio Bona, Diego Cason, Mariapaola Colleselli, Franco Crevatin, Miriam Curti, Iolanda Da Deppo, Lucia Da Rif, Jacopo De Pasquale Carlo Fabris, Cesaremaria Glori, Luigi Guglielmi, Cesare Lasen, Adriana Lotto. Marco Perale, Daniela Perco, Giorgio Reolon, Sergio Sacco, Renata Svaluto Moreolo, Flavio Vizzutti ont Giandomenico Zanderigo Rosolo.

De òrbetn miasn ogem kemmen vour de 30 van prochet 2020 en de kanzlai van konkurs ka Belluno.

Lorenza Groff