Coronavirus: dal 1m de dezember sarà en doura l numer vert 800-867 388
I provedimenc en doura, i spostamenc, la scola e bensegur la prozedures per i tampons, i isolamenc e la carantenes.
Responarà a 360 degrees i operadores del numer vert 800-867 388 metù a jir endò dal 1m de dezember aldò de la sacotanta domanes de informazion che l’é dò a ruèr ence te chest moment de emergenza. L numer vert debant – gestì da la Protezion zivila tras la Zentrèla unica de emergenza desche tel prum moment de la pandemìa – respon a la domanes di sentadins da les ot da doman enscin les sie da sera dal lunesc al vender e da les ot da doman enscin la does domesdì de sabeda. Se cognessa entravegnir sintomes che ge somea a chi del Covid – 19 vegn conseà semper de fèr referiment a sie dotor o dotor per i bec de familia, enveze l 112 (un-un-doi) l cogn vegnir chiamà demò tel cajo de na emergenza reèla e no per domanes de informazion generiches.
L numer vert 800-867 388 l’é stat metù a jir la pruma outa de firé per responer a la sacotanta domanes de informazion di sentadins e l’é stat lascià sù de messèl, canche i contages i era n muie smendré e la domanes di utenc no les era più tropes.
Per l scomenz endò de la scoles, per la domanes di trasporc personalisé (Elastibus) e ence per la gestion de chi che vegn de retorn te sie raion e per chi che che vegn da la foresta l’é stat metù a jir enveze l numer vert 800-390 270. Te la ùltima setemènes chest numer l’à responet ence en cont de la costions che revèrda la domanes di tampons e la prozedures de isolament e carantena. Ades a duta la domanes responarà l numer 800-867 388.
Recordà che sul sit de l’Azienda provinzièla per i servijes sanitères l’é a al leta na sezion semper agiornèda co la domanes en cont de contages, tampons, isolamenc e carantenes (https://www.apss.tn.it/faq-coronavirus), enveze sul portal de l’ofize stampa de la Provinzia autonoma de Trent l’é na sezion dedichèda a l’emergenza coronavirus con duc i provedimenc nazionèi e provinzièi, la desposizions prinzipèles e i protocoi (https://www.ufficiostampa.provincia.tn.it/CORONAVIRUS-Aggiornamenti-e-comunicazioni).
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)