“Il Moro della cima”, a roman von Paolo Malaguti gespilt aftzn pèrge Grappa, un mage nèt soin åndarst baz gepuntet in Earst Bèltkriage, hatt gebunnt in Prais Mario Rigoni Stern vor di leteratùr vo mearar zungen von Alpm. Dar zerimònie bodase iz gehaltet an vraita atz 2 von herbestmånat in Palacongressi vo Riva aftn Gardasee, hatta getrakk soin gruaz da autonome Provìntz vo Tria, pitt soin vitzevorsitzar un Asesór vor di umbèlt, boda hatt untarsticht bia disa naüge editziong von Prais boda trakk in nåm von groaz schraibar vo Slege, besteteget bia bichte ’z izta khent disar trèff boda alle di sèlln boda håm gearn di kultùr von pèrng mang nètt mengln.
Auz pan abas izta khent darzuar gètt dar prais Guardiano dell’Arca – Osvaldo Dongilli in paing, vor in ruòl boda håm zo schütza di biodiversitét. Dar prais iz khent genump von entomologo, paigar un nåsüachar vodar Stiftung Edmund Mach Paolo Fontana, a gåntz a hoachar balma redet vo paing.