En Trentin sai' noch za kemmen de earstn sanitarzeitler a'ne chip. De bea'ne hòlblaiter as men vint as de gònze bèlt ver sèll as men praucht za mòchen de elektroneschn componentn, hòt gamòcht tschbinnen en Minister ver en enviregea' va de birtschòft (Mise) za bècksln a toal van zeitler as nea'ner gilte sai' pet naia sanitarzeitler, òlla gamòcht a'ne chip, a'ne microprocessor. Der doi leiste ist gilte gaben za prauchen de sanitarzeitl abia Nazional Kòrt van dinstn (TS-CNS) oder provinzal Kòrt van dinstn (TS-CPS) en Trentin ont ver de online dinstn va de òllgamoa' amministrazion. Men miast klar song as de nai zeitl – de sèll a'ne chip (TS) – funzioniart en gònzn abia de vouder: s ist gilte abia fiscal nummer, s lòk aninn gea' en de dinstn van nazional kronkendinst sistem (u'melln se ver visite en paispil) ont ver de kronkendinst hilf en de Europa Union. En Trentin sai' a bea'ne mear va 18tausnt de lait as prauchen de sanitarzeitl ver de digitaln dinstn keing de iber 220tausnt lait as hom liaber prauchen der Spid, de nai' digitalet identitat en balschlont. Ver za gea' enkeing en doi umdinst, der govern hòt gabellt iaz enviretrong de giltezait as mòcht prauchen de zeitler as gea' nea'mer, gilte abia digitalet identitat finz en schantonderer 2023. De lait as vinnen se pet de nai sanitarzeitl a'ne chip ont bill dena prauchen sa ver de digitaln sistem, bart miasn prauchen peada de zeitler: de nai TS ver kronkendinstn sochen ont de vourder TS/CPS (pet en chip) ver de digitaln sochen.