In Trentino soinda drå zo riva di earstn sanitér kartn åna chip. In da gåntz bèlt venntma nemear di halblaitar, un di matardjéldar zo macha di eletroneschen sachandar boda soin mångl, ditza hatt gezbunk in Ministèr auzzobèksla di sanitér kartn boda soin geskadart, boda håm in chip, pitt naüge åna mikroprotzessor. Dar mikroprotzessor iz mångl zo maga nützan da sanitér kart azpe natzionàl Kart vor di Dianst (TS-CNS) odar in Trentino, da provintziàl Kart vor di dianst (TS-CPS) un vor di dianst online vodar öffentlesche vüarom. Ma mocht khön ke da naüge kart, åna chip (TS) geat allz ummaz guat vor di bichtegarstn sachandan: di varlért azpe augeltnummar, di sichart zo maga håm allz bazta ågeat in natzionàl sanitér sistèm (vürlegen visite, baispil) un gitt o zuar zo maga inngian in da européan sanitér asisténtz. In Trentino soinsa eppaz mearar baz 18 tausankh di pürgar boda nützan da sanitér kart vor di dianst online kontra in 220 tausankh boda nützan in spid, da naüge belese didjital identitét. Zo khemma inkeng in laüt dar governo hatt detzidart zo vorlengra di validitét von kartn drå zo skadra sin in kristmånat von djar 2023. Dar pürgar bodase vinnt pittar naüng kart åna chip un bill allz ummaz inngian in di didjitaln sistème mocht nützan poade di kartn: da naüge vor bazta ågeat in sanitér sachandarn un da alt pinn chip vor bazta ågeat di didjìtàl dianst.