Ma hatt gevunet alle pittnåndar bele arbatn zo macha aftn bege von Laaz: in an trèff vürgevüart von vorsitzar vodar autonome Provìntz vo Tria un bodase iz gehaltet in Dånte Platz in di vorgånnatn tang, di pürgermaistarn vo Folgrait, Lavròu, Lusérn, Kalnètsch, Leve un Plaif soinse gevuntet pinn provintziàln tèknike – dar djenràl diridjént von Dipartimént vor di infrastruktùrn Luciano Martorano un sostitùtt Diridjént von dianst vor di arbatn afte beng un aisanpån Carlo Benigni – un håm geschètzt mearare optziongen boda soin khent vürgetrakk zo sichra un auzzopezzra in provintziàl bege 133 vo Monterùff boda khint khött Laaz odar Menador odar no Kaiserjägerstrasse.
Von trèff izta auz khent ke dar stòrege bege boda auvar khint bart khemmen gehaltet op un zua azpe dar iz, haltante kunt von groaz vèrt boda hatt disar bege, saiz azpe stòrdja, saiz azpe auzseng un bia dar ziaget zuar di turistn, anvétze zo giana nidarbart izta khent vürgelekk zo macha a galeria lai in nidar, asó makmase mövarn pezzar, darzuar auz nå barta khemmen gehaltet a staige vor di redar.