L provediment l é stat tout su do dai zertamenc tecnics e da la valutazions de stima metudes a jir dessema coi comuns touc ite (Sèn Jan, Ciampedel e Mazin), e tegnù cont de tant che i dans i é grieves, da la sort di dans, di sogec e del contest sozio-economich tout ite, estra che de la ressorses fianzièles a la leta.

I contribuc e la refonudes pervedudes (art. 74 de la l.p. n. 9 dai 2011) les é outes a slejierir i cosć che à i sentadins per meter a post i dans abui per chesta sorts de bens e ativitèdes:

1. cèses e sia pertinenzes, tout ite i impianc e i lurieres per portèr demez l materièl, mobilia e èrc prinzipèi;
2. auti privac.

Col provediment tout su l é stat ence ressèrvà la suma per la speisa de 500.000 euro sul an finanzièl 2023.
Vedù che te chest moment, l é amò en cors l zertament di dans a la ativitèdes economiches, l é stat conscidrà benfat ge dèr su a n auter provediment l’aproazion di criteries spezifics per la conzescion de contribuc per chisc setores.