Da soin pròpio vil di prodjèkte boda dar Euregio Tiról-Südtiról-Trentino trakk vür innzovånga, zo macha khennen tra de se un abezolirna di djungen von drai lentar. vodar schual aftn sport, von kulturàln arbatn, afte sèlln übar musìk afte edukatziong, dar Euregio lekk vür vor di djungen vo aniaglana eltung prodjèkte zo lirna arbatn pittnåndar un zo machase tschelle übar alle di konfìn.
Nèt vor nicht dar spruch boda iz khent zornìrt vodar trentinar vorsitzarung 2021-2023 iz “Dar Euregio iz djung” zo untarstraicha ke ma bill gem vèrt daz earst vo allz in djungen djeneratziongen, haltante o kunt ke ’z djar 2022 iz pròpio daz européan Djar von Djungen.
Azpe da gedenkht dar vorsitzar vodar autonome Provìntz vo Tria un von Euregio Marizio Fugatti: “Haltn da kunt di naüng djeneratziongen billz soin gemuant haltn da kunt di zukunft. Vor daz sèll habar geböllt azta dar Euregio untar da trentinar vorsitzarung saibe nåmp in djungen pürgar pitt konkrètege initziativan un naüge arbatn”.