En doi bochen as ber sai’ òlla hoa’m, hom ber bail ghòp za tea’ òlla de sèlln òrbetn as ber hom nia gabellt tea’. Ober ber hom de meglechket aa gahòp za stea’ pet de familia, za mòchen de compite pet de kinder, za vertraim a bea’ne zait òlla zòmm.
En doi artikl hòn e tsbunnen za stelln enk vour an etllena spiln, piacher ont òndra projektn as bersntolerisch as men mu mòchen pet de gònze familia. Òlla de doin sòchen vinnt men sa as de web sait van Bersntoler Kulturinsitut en toal Mediateca.

De Mediateca ist a web- plòtt- form as gip de meglechket za vinnen vil òrbetn ont materialn as hèlven kennen ver za learnen ont mòchen kemmen mear pakònnt s bersntolerisch. De materialn sai’ gamòcht kemmen van Bersntoler Kulturinstitut, va de Earsteschual va Vlarotz ont va de Tolgamoa’schòft Hoa Valzegu’ ont Bersntol ont kennen tsechen kemmen oder direkt arogalont van òlla de enteressiaretn. S sai’ tèkstn, ibersetzn, stickler va audio, musikstickler, literarischa ont etnografischa tèkstn en formatn abia tèkstn, ibersetzn, zoachn, ver za learnen de sproch ont de kultur.

De Mediateca ist toalt en drai gruppn: “Zaitschrifn”, “Piacher as kontarn” ont “Video”.
En earste toal mu men vinnen de sait “Liaba lait”, de zaitschrift “Lem” ont òndra materialn.

Ober s schea’neste toal ver miar ist “Piacher as kontarn”. Ar kònnst lesn as puach as bersntolerisch ont derbail lisnen a stimma s kontart s puach. Dòs ver miasi ist runt schea’ ver òlla: vr de kinder as kònnen nèt lesn ober aa ver de sèlln as belln eppes learnen va de inser sproch.
En toal “Video” mu men sechen runt enteressanta video as klòffen va de inser gamoa’schòft.

De Mediateca ist an interessantn projekt as billt toaln pet de mearestn lait as ist meglech de doin materialn ont gem en òlla an guatn sproch- modell pet en kummer aa za tea’ aupasn as en sèll as drin steat ont as en beil vurm as mittoalt kimmp. De plòttform ist gamòcht as an vurm as men kònnt òlbe derzua leing ont bèsksln materialn ont asou òlla de naiekettn barn raichern der doi “archif” as òlbe austschaukt ont untersuacht kemmen kònnt.

Dòra, an òndern schea’n projekt, ist der spil “Roas as de Ploachn Pèrng” oder as balsch “Avventure sui monti pallidi”. S ist an projekt va de Provinz, van Tsm, van Muse ont van òndra Omtn gaben. Der il ist za kennen pesser de umbèklt va de Dolomitn ont en u’vòng ist er lai as ladin gaben. Der spil ist gamòcht va zboa piachler, s earste ver de kinder pis as 8 jor ont der ònder ver de greaseren. Men hòt an ettlen skede as kontarn van bòlt, van dever, van himbl, van pèrng ont de kinder miasn vinnen de vicher ont de dinger as men vinnt en an iata skeda. Der doi spil ist runt schea’ bavai er gip ens de meglcket za kennen ònda sprochen aa bavai er ist ibersetzt kemmen af ladin, zimbar, bersntolerisch, balsch, englisch ont taitsch. Sèll as ist enteressant ist as s spil mu digitalet aa sai’. S ist ganua en internet gea’ ont drucken de skede. Oder, ver de greseren, der spil ist kemmen an app ver en telefonidl aa.

S ist an digitalspil as pet de fantasi barn bècksln en a gònz ausòndra bèlt za suachen aus: de bèlt van Dolomitn gahoasn aa Ploachn Pèrng.
Ver za sechen s doi spil, de adress ist http://avventuresuimontipallidi.it oder van sito van Bersntoler Kulturinstitut www.bersntol.it, “Risorse” ont “Pubblicazioni”.
Geat za sechen de doin schea’n spiln!

Lorenza Groff