S Bersntoler Kulturinstitut hòt ausgaleik an bando ver za suachen mitòrbeter. S ist a selesion ver vrong va òrbetn va untersuach as de inser sproch.

Oa’n van bichtestn ziln van Institut ist za trong evire ont gem bèrt en de sproch. Being en sèll, en de leistn jarder sai’ kemmen organisiart vil projektn asn tema va de sproch. De doin projektn kearn um en tema va de klòfft ont va de tschrim sproch. De earstn sai’ zan paispil de interviste, de fim ont òlls sèll as hòt za tea’ pet en sèll pet en klòfft. De projektn as de tschrim sproch enveze kearn um en schrift. De Grammatk “Liacht as de sproch” as ist kemmen tschrim van professor Antony R. Rowley en 2002 ont as ist bider gadruckt kemmen en 2017 pet de zvaite edizion, ist gaben der earste tritt ver za learnen za schraim s bersntolerisch. De ist kemmen gadruckt no vil jarder va untersuach ont òrbet ont er ist s hèrz van òlla de projektn as de sproch as sai’ kemmen gamòcht derno. Dòra sai’ kemmen gamòcht vil projektn kursn, piacher ont strumentn.

De leistn projektn, iberhaup pet en enviretrong der studio va de sproch, leing òlbe mear zòmm der tema van klòfft pet en sèll van tschrim. An paispil ist der projekt va de datnpònk as hòt gamòcht de earst trittn nou en 2003.  Der zil ist za veròrbetn a groasas beirterpuach van bersntolerisch. Oberde ddatnpònk ist nèt lai sèll as ber sai’ gabe’t,  a puach pet drau de beirter pet de ibersetz. De datnpònk ist digitalet. An iats bourt hòt a skeda bo as kemmen tschrim òlla de informazionen asn sèll bourt: abia as men schraipt s, abia as men sok s en Palai, en Vlarotz ont en Oachlait, de sinonimi, menn s ist nou kemmen tschirm en òndra òlta beirterpiacher, bos as bill song s bourt, an letratt, ont òndra informazionen. S ist an òrbet as mechet ver jarder envire gea’ bavai men mu òlbe òndra informazionen drinnleing.
Being en sèll s Institut vrok òll jor de mitòrbet va untersuacher, abia za paispil iaz pet en doi bando.

De mitòrbeter bart mòchen untersuach, gea’ kan lait za vrong informazion, veròrbetn der audio ont de video, klòffen pet de referentn van projekt ont asou envire. Der òrbet bèrt tauern finz as de rif van jor. De mentschn as barn auganommen kemmen miasn bersntolerisch (pet en patentin), balsch ont taitsch kennen, hom der diplom va hoaschual oder de laurea ont kennen de òrbet va untersuach.
De vrog zòmm pet an dokument mias tschickt kemmen vour de 29 van doi mu’net (en vraita as kimmp) pet an e-mail en adress kultur@kib.it. Òndra informazionen ont der modell va de vrog sai’ en internet as de sait van Bersntoler Kulturinstitut.

Lorenza Groff