Tel Trentin l é do che vegn dat fora la pruma tesseres sanitères zenza chip. La mencianza te dut l mond de semicondutores, l materièl de basa che serf per realisèr i componenc eletronics, à obligà l Minister del svilup economich (Mise) a mudèr fora na pèrt de la tesseres che é do a jir fora de validità, dutes col chip, con de neva tesseres, che no à l microprozessor. Chest l serf per poder durèr la tessera sanitèra ence desche Chèrta nazionèla di Servijes (TS – CNS) o Chèrta provinzièla di servijes (TS- CPS) tel Trentin e di servijes online de l’aministrazion publica. Ge vel sotrissèr che la neva tessera – chela zenza chip (TS) – la pel vegnir durèda te duta sia funzions prinzipales: valer desche codesc fiscal, arsegurèr l azes a la prestazions del sistem sanitèr nazionèl (prenotèr la vijites, per ejempie) e consentir l azes a l’assistenza sanitèra te la Union europeèna. Tel Trentin passa 18 mile sentadins doura la tessera sanitèra per i servijes digitèi e passa 220 mile, enveze, i preferesc Spid, la neva identità digitèla talièna. Per ge fèr front a chest problem, l goern l à dezidù da pech de sperlongèr la validità del zertificat che dèsc l met de durèr la tessera sanitèra che é do a jir fora de validità desche identità digitèla scin de dezember del 2023. L sentadin che ciapa la neva tessera sanitèra zenza chip e che aboncont l vel se emprevaler di sistemes digitèi, l cognarà durèr duta does la tesseres: la neva TS per l ambit sanitèr e la veia TS / CPS (col chip) per la pèrt digitèla.