“I cincant’egn de Arge Alp l é la testimonianza de n gran projet, scomenzà via apontin da chest lech de gra a sie fondadores. N projet de colaborazion, de dialogh, de pèsc anter i popui: te n moment desche chest, olache la vera la é tel cher de l’Europa se pel entener che l é dalbon emportant che i desvalives teritories i se sproe a colaborèr e dialoghèr anter de ic. N messaje de dialogh che speron l vegne entenù e tout su”. Chest à dit l president de la Provinzia autonoma de Trent Maurizio Fugatti a la fin de la zerimonia per recordèr i 50 egn de la Comunità de Lurier de la Regions Alpines stata a Mösern, tel Tirol aló da la Ciampèna de la pèsc del spazie alpin, olache à tout pèrt ence i raprejentanc istituzionèi de la Regions de Arge Alp.

Estra al president Fugatti, l era ence l president de la Provinzia autonoma de Busan Arno Kompatscher, l capitan del Tirol Günther Platter, i raprejentanc de la Regions Arge Alp da la Baviera, Länder Vorarlberg, Tirol e Salisburgo, Region Lombardia Canton di Grijons, San Gallo e Ticino. Do da la pruma zerimonia, a chela che à tout pèrt i Schützen del post, che i à saludà la autoritèdes e la musega de Telfs che à viventà la festa, l grop l é jit envers l col de la Ciampèda de la pèsc del spazie alpin, per n moment de reflescion dessema dintornvia i valores che l é a la basa de Arge Alp e che la medema la se met dant.