Zo reda übar disarn arbat drzuar pinn schraibar Carlo Romeo, soinda o gest dar Giuseppe Ferrandi, Dirèktor vodar stiftung Museo Storico von Trentino un di Elisa Bertò, von Åmt von Euregio ka Tria, poade soin toal von arbat khnopf von Euregio afte stòrdja.
’Z puach opfart “an blik atz allz pittnåndar boda zuargitt zo khenna pezzar di sachandarn, zoa zo maganen machan sèlbart an idea von geleba pittnåndar un zo venna zaitn vodar stòrdja boda soin toal vo alln. Ma ’z tratartze nèt zo kheara bidrùmm aftna idea vonan stòrege Tiról”, azpe da hatt khött dar Ferrandi, boda hatt o khött ke ’z puach zoaget an metodo zo arbata pittnåndar zbisnen in drai lentar, boda håm mearare sachandar pittnåndar un boda håm zuargètt zo maga auleng da européan Redjong Tiról-Südtiról-Trentino.